Helgihald í Selfossprestakalli sunnudaginn 21.maí

Á morgun, sunnudag 21.maí verður messa í Selfosskirkju kl. 11.  Kór kirkjunnar syngur undir stjórn Edit Molnár.  Prestur sr. Ninna Sif Svavarsdóttir.  Súpa og brauð í safnaðarheimilinu gegn vægu gjaldi að messu lokinni.

Kl. 13.30 er helgistund á hjúkrunarheimilinu Ljósheimum.

Kl.20 er kvöldmessa með þáttöku Bifreiðaklúbbs Suðurlands þar sem Sóli Hólm fer með gamanmál.  Prestur sr. Ninna Sif Svavarsdóttir.

Kvöldmessa með Sóla Hólm og Bifreiðaklúbbi Suðurlands

Næstkomandi sunnudagskvöld 21.maí verður hressandi og skemmtileg kvöldstund í Selfosskirkju.  Kvöldmessa hefst kl. 20 þar sem Sóli Hólm mun fara með gamanmál og e.t.v. taka nokkur lög eins og honum einum er lagið.  Messan er haldin í samstarfi við Bifreiðaklúbb Suðurlands sem mun eftir messu bjóða messugestum að skoða bíla sína á bílastæðinu við kirkjuna og boðið verður upp á kaffisopa í safnaðarheimilinu.  Prestur er sr. Ninna Sif Svavarsdóttir.
Allir hjartanlega velkomnir – sjáumst í kirkjunni!

Krossamessa 30.apríl

Nk. sunnudag 30.apríl kl. 11 verður krossamessa í Selfosskirkju sem jafnframt er uppskeruhátið barna – og unglingakóra kirkjunnar.  Þar fá þær stúlkur sem útskrifast á þessu vori úr kórastarfi kirkjunnar afhenta sérsmíðaða silfurkrossa af sóknarnefnd kirkjunnar í þakklætisskyni fyrir það sem þær hafa lagt af mörkum og gefið af sér í kórastarfinu.  Báðir kórarnir syngja í messunni undir stjórn Edit Molnár.  Prestur er sr. Ninna Sif Svavarsdóttir.  Súpa og brauð í safnaðarheimilinu á eftir gegn vægu gjaldi.  Vorgleði og tónlistarveisla í kirkjunni – allir velkomnir!
 

Boðunardagur Maríu

Nk. sunnudag 26.mars verður messa í Selfosskirkju þar sem boðunardags Maríu verður minnst.  Líklega er ekkert myndefni í sögunni algengara eða vinsælla en María og litli drengurinn hennar, og um Maríu hafa líka verið samin mörg falleg tónverk.  María var sterk kona sem falið var afar sérstakt hlutverk.  Af henni getum við öll lært.

Sunnudagaskólinn er á sínum stað kl. 11 í umsjón Jóhönnu Ýrar og æskulýðsleiðtoga.

Súpa og brauð gegn vægu gjaldi í safnaðarheimilinu að messu lokinni.

Verum öll velkomin – sjáumst í kirkjunni!

Helgihald í Selfossprestakalli sunnudaginn 12.febrúar

Nk. sunnudag 12.febrúar verða þrjár messur í prestakallinu.  Kl. 11 verður fjölskyldumessa í Selfosskirkju þar sem barnakór kirkjunnar syngur.  Þetta verður skemmtileg og gefandi stund fyrir alla fjölskylduna.  Æskulýðsfélag Selfosskirkju verður með kökubasar að lokinni messu og súpa og brauð selt gegn vægu gjaldi í safnaðarheimilinu.  Umsjón með stundinni hafa sr. Ninna Sif og Jóhanna Ýr og Edit Molnár er kórstjóri.

Kl.13.30 verður guðsþjónusta í Villingaholtskirkju þar sem söngkór Villingaholts – og Hraungerðissókna syngur undir stjórn Inga Heiðmars Jónssonar organista.  Prestur sr. Ninna Sif Svavarsdóttir.

Kl. 20 verður kvöldmessa í Selfosskirkju þar sem hljómsveitin Hrafnar sér um tónlistina.  Þetta verður létt og skemmtileg kvöldstund.  Prestur sr. Ninna Sif Svavarsdóttir

Eitthvað fyrir alla – sjáumst í kirkjunni!

Helgihald í Selfossprestakalli þriðja sunnudag í aðventu

Nk. sunnudag 11. desember verður guðsþjónusta í Selfosskirkju.  Þar mun barnakór kirkjunnar flytja helgileik og unglingakór kirkjunnar syngja undir stjórn Edit Molnár.  Sunnudagaskólabörnin fá líka að sjá helgileikinn en fá að sjálfsögðu einnig mynd að lita og límmiða.  Súpa og brauð að guðsþjónustu lokinni.  Prestur sr. Ninna Sif Svavarsdóttir.

Í Hraungerðiskirkju verður aðventustund kl. 13.30 þar sem söngkór Villingaholts – og Hraungerðissókna syngur undir stjórn Inga Heiðmars Jónssonar.  Prestur sr. Ninna Sif Svavarsdóttir.

Meðfylgjandi mynd er tekin þegar barnakórinn flutti helgileikinn Fæðing frelsarans eftir Hauk Ágústsson á jólasamveru Félags eldri borgara á Selfossi.20161208_145541

Leiksýningin Aðventa í Selfosskirkju 1.desember

Fimmtudaginn 1.desember kl.10 verður boðið upp á leiksýninguna Aðventu í uppsetningu Möguleikhússins.  Um er að ræða leikgerð samnefndrar sögu eftir Gunnar Gunnarsson.  Pétur Eggerz leikur vinnumanninn Benedikt sem fer til fjalla í vetrarríki aðventunnar að leita þess fjár sem eftir varð er smalað var um haustið.  Það er köllun hans að koma þessum eftirlegukindum til byggða fyrir hátíðirnar.  Söguna byggir höfundur á frásögnum af frægum svaðilförum Benedikts Sigurjónssonar, öðru nafni Fjalla-Bensa, á Mývatnsöræfum og einkum þó eftirleitarferð sem hann fór í desember 1925.  Þetta er klassísk saga um náungakærleika og fórnfýsi í vetrarhörkum íslenskra öræfa.  Sýningin tekur um 60 mínútur, það kostar ekkert inn og það eru allir velkomnir!

Aðventa Möguleikhúsið

Aðventa
Möguleikhúsið

Fyrsti sunnudagur í aðventu

Fyrsti sunnudagur í aðventu er hátíðisdagur í Selfosskirkju.  Þá verður fjölskylduguðsþjónusta kl. 11 þar sem unglingakór kirkjunnar syngur undir stjórn Edit Molnár.  Börn sem taka þátt í kórnámskeiði munu einnig syngja, og félagar úr æskulýðsfélagi kirkjunnar koma fram með tónlistaratriði.  Umsjón með stundinni hafa sr. Ninna Sif og Jóhanna Ýr æskulýðsfulltrúi.  Brúður, biblíusaga, söngur, hlátur og gleði! Að messu lokinni mun unglingakór kirkjunnar reiða fram grjónagraut í safnaðarheimilinu og er  það hluti af fjáröflun kórsins og þar verður einnig hinn árlegi og glæsilegi kökubasar kórsins.  Þetta verður skemmtileg og innihaldsrík stund fyrir alla fjölskylduna.  Sjáumst í kirkjunni!

aðventukrans

Konur eru konum bestar – sjálfstyrkingarnámskeið í Selfosskirkju

 

Sjálfstyrkingarnámskeiðið Konur eru konum bestar verður haldið í Selfosskirkju þriðjudagana 30.ágúst og 6.september  kl. 19-22.

Námskeiðið miðar að því að byggja upp sjálfsmynd kvenna og skapa þeim vettvang til að kynnast sjálfum sér betur í góðu samfélagi við aðrar konur. Fjallað verður um mikilvægi þess að styðja hver við aðra og standa með sjálfri sér. Ýmsum spurningum er velt upp og sögur Biblíunnar eru notaðar til að varpa ljósi á viðfangsefnið.

Námskeið þetta hefur notið fádæma vinsælda innan kirkjunnar síðustu 20 árin. Það hefur verið haldið víðsvegar um landið, m.a. í Selfosskirkju sl. vetur og fjölmargar konur lýst ánægju sinni með það.  Þátttaka er konum að kostnaðarlausu, en skráning er nauðsynleg, annað hvort á ninnasif@gmail.com eða gudbjorg.arnardottir@kirkjan.is