Nætkomandi sunnudag verður barna- og fjölskylduguðsþjónusta í Selfosskirkju kl. 11:00.  Þar mun barna- og unglingakór Selfosskirkju hefja vetrarstarf sitt og syngja, stjórnandi er Edit Molnár.  Umsjón með guðsþjónustunni hafa prestarnir Ninna Sif og Guðbjörg ásamt Jóhönnu Ýr nýjum æskulýðsfulltrúa.  Eftir guðsþjónustuna verða samlokur og ávextir í safnaðarheimilinu og kynning á vetrarstarfinu.  Um kvöldið verður svo létt-guðsþjónusta þar sem hljómsveitin Slow Train mun spila Bob Dylan lög og prestarnir Guðbjörg og Ninna Sif leiða stundina.  Þetta verður eðal sunnudagur í kirkjunni og þau sem vilja hita upp fyrir sunnudagaskólann í vetur geta byrjað að læra lagið Í sjöunda himini sem verður sungið í sunnudagaskólanum í vetur.

Selfosskirkja mun bjóða upp á sjálfstyrkingarprógrammið 12. sporin –Andlegt ferðalag í vetur.

Vinir í bata, munu leiða starfið af stað og hefst það miðvikudaginn 16. september.  Vinir í bata er hópur fólks sem hefur farið sjálft í gegnum prógrammið og tileinka sér Tólf sporin sem lífstíl og hefur það að markmiði að gefa öðrum kost á því að kynnast þessu prógrammi, vegna þess að þetta starf hefur gefið mörgum mjög mikið og orðið fólki til blessunar. Tólf spora vinna hentar öllum þeim sem í einlægni vilja vinna með tilfinningar sínar í þeim tilgangi að öðlast betri líðan og meiri lífsfyllingu þar sem leitað er styrks í kristinni trú.

Boðið er upp á þrjá opna kynningarfundi þar sem fólk hefur tækifæri til að sjá út á hvað prógrammið gengur, á fjórða fundi er hópnum lokað og unnið er út frá vinnubókinni 12.sporin -Andlegt ferðalag. Unnið er í litlum lokuðum hópum, vinnan gengur út á að deila eigin reynslu styrk og von, mæta á vikulega fundi sem eru haldnir á miðvikudagskvöldum kl.20:00-22:00 í safnaðarheimili Selfosskirkju í vetur. Kirkjan býður þátttakendum upp á þetta þeim að kostnaðarlausu, utan þess að þeir þurfa að kaupa vinnubókina  12. Sporin –Andlegt ferðalag  sem er til sölu í Bókakaffi á Selfossi.

Vinir í bata (VIB) eru með heimasíðu, viniribata.is, þar er hægt að nálgast frekari upplýsingar um 12.sporin –Andlegt ferðalag.  Nánari upplýsingar um starfið gefur Hugrún Kristín Helgadóttir í síma 822 84444.

Jóhanna Ýr Jóhannsdóttir hefur verið ráðinn nýr æskulýðsfulltrúi í Selfosskirkju.  Hún hefur áður starfað að æskulýðsmálum innan kirkjunnar og er með BA próf í guðfræði og réttindi í kennslufræðum.  Við bjóðum hana velkomna til starfa hlökkum til samstarfsins.

Messa sunnudaginn 30. ágúst kl. 11:00.

Prestur Guðbjörg Arnardóttir, organisti Jörg Sondermann, Kirkjukór Selfosskirkju syngur.

Súpa í safnaðarheimili á eftir gegn vægu gjaldi