Síðastliðinn föstudag átti Ína okkar 40 ára starfsafmæli í Selfosskirkju. Hún hefur staðið vaktina við ræstingar með miklum sóma. Við nutum góðs af þessum tímamótum því Ína kom með rjómapönnukökur og annað góðgæti.  Takk fyrir allt Ína 🙂

Sunnudaginn 28.febrúar verður  messa og sunnudagaskóli kl. 11.  Sr. Ninna Sif þjónar í messunni, kór kirkjunnar syngur og Edit Molnár leikur á orgel.  Sunnudagaskólinn er í höndum æskulýðsleiðtoga.  Og svo er súpa í safnaðarheimilinu að messu lokinni.  Njótum þess að eiga gott samfélag á sunnudagsmorgni – sjáumst í kirkjunni!

Það er mikill undirbúningur í gangi fyrir 70. ára afmælistónleika Kirkjukórs Selfosskirkju sem fara fram þann 19. mars . Kórinn hélt æfingardag í Hveragerðiskirkju laugardaginn 20. febrúar þar sem stífar og langar æfingar skiluðu góðum árangi. Það var sérstaklega gagnlegt þegar heimakórinn sameinaðist kirkjukórnum og kórarnir æfðu saman tvö verk sem þau munu flytja saman á afmælistónleikunum . Æfingin heppnaðist mjög vel og er ávísun á stórbrotin flutning á væntanlegum tónleikum.

Ástin, drekinn og dauðinn í Selfosskirkju

Á síðustu þremur árum hefur Vilborg Davíðsdóttir rithöfundur og þjóðfræðingur kvatt eiginmann sinn, tengdamóður, föður og litla dótturdóttur. Bók hennar, Ástin, drekinn og dauðinn, sem kom út í fyrra, hefur vakið mikla athygli og hlotið lof fyrir að fjalla um ástvinamissi og sorg á áhrifamikinn en um leið jarðbundinn hátt. Þar lýsir hún vegferð sinni og Hennar heittelskaða með sjúkdómi sem þau vissu að myndi draga hann til dauða og fyrsta árinu eftir að hún varð ekkja. Á þriðjudagskvöld, þann 23. febrúar, mun Vilborg flytja erindi í Selfosskirkju um hvernig dauðinn breytir tilveru þeirra sem eftir lifa og hvað má af honum læra. Bók hennar veitir í senn innsýn í veröld krabbameinsins og djúpa sorg þess sem hefur elskað og misst. En hún er ekki síður óður til kærleikans, hvatning til að lifa í árvekni og sættast við að dauðinn er órjúfanlegur hluti af lífinu.

Erindi Vilborgar í Selfosskirkju hefst kl. 19:30 og eru allir velkomnir.

Næsta sunnudag verður heldur betur fjör í sunnudagaskólanum. Krakkarnir fá að heyra Biblíusögu, þau syngja og Nebbi Nú verður á skjánum en hann hefur slegið í gegn í kirkjuskólanum í vetur.

Konni ætlar líka að kíkja í heimsókn og svo munu börnin fá að föndra kerstjana úr leir eins og á myndinni í lok stundarinnar. Að sjálfsögðu fá öll börm límmiða líka.

Sjáumst í sunnudagaskólanum!

Sunnudaginn 14.febrúar verður messa í Selfosskirkju kl. 11.  Kirkjukórinn syngur og sr. Ninna Sif Svavarsdóttir þjónar.  Organisti Edit Molnár.  Sunnudagaskóli á sama tíma og súpa á eftir í safnaðarheimilinu.  Kl. 14 er svo guðsþjónusta í Hraungerðiskirkju þar sem Húnakórinn í Reykjavík ætlar að syngja undir stjórn Eiríks Grímssonar.  Kaffi að guðsþjónustu lokinni í Þingborg.  Allir velkomnir – sjáumst í kirkjunni!