Nk. sunnudag 11. desember verður guðsþjónusta í Selfosskirkju.  Þar mun barnakór kirkjunnar flytja helgileik og unglingakór kirkjunnar syngja undir stjórn Edit Molnár.  Sunnudagaskólabörnin fá líka að sjá helgileikinn en fá að sjálfsögðu einnig mynd að lita og límmiða.  Súpa og brauð að guðsþjónustu lokinni.  Prestur sr. Ninna Sif Svavarsdóttir.

Í Hraungerðiskirkju verður aðventustund kl. 13.30 þar sem söngkór Villingaholts – og Hraungerðissókna syngur undir stjórn Inga Heiðmars Jónssonar.  Prestur sr. Ninna Sif Svavarsdóttir.

Meðfylgjandi mynd er tekin þegar barnakórinn flutti helgileikinn Fæðing frelsarans eftir Hauk Ágústsson á jólasamveru Félags eldri borgara á Selfossi.

Fimmtudaginn 1.desember kl.10 verður boðið upp á leiksýninguna Aðventu í uppsetningu Möguleikhússins.  Um er að ræða leikgerð samnefndrar sögu eftir Gunnar Gunnarsson.  Pétur Eggerz leikur vinnumanninn Benedikt sem fer til fjalla í vetrarríki aðventunnar að leita þess fjár sem eftir varð er smalað var um haustið.  Það er köllun hans að koma þessum eftirlegukindum til byggða fyrir hátíðirnar.  Söguna byggir höfundur á frásögnum af frægum svaðilförum Benedikts Sigurjónssonar, öðru nafni Fjalla-Bensa, á Mývatnsöræfum og einkum þó eftirleitarferð sem hann fór í desember 1925.  Þetta er klassísk saga um náungakærleika og fórnfýsi í vetrarhörkum íslenskra öræfa.  Sýningin tekur um 60 mínútur, það kostar ekkert inn og það eru allir velkomnir!

Aðventa
Möguleikhúsið

Fyrsti sunnudagur í aðventu er hátíðisdagur í Selfosskirkju.  Þá verður fjölskylduguðsþjónusta kl. 11 þar sem unglingakór kirkjunnar syngur undir stjórn Edit Molnár.  Börn sem taka þátt í kórnámskeiði munu einnig syngja, og félagar úr æskulýðsfélagi kirkjunnar koma fram með tónlistaratriði.  Umsjón með stundinni hafa sr. Ninna Sif og Jóhanna Ýr æskulýðsfulltrúi.  Brúður, biblíusaga, söngur, hlátur og gleði! Að messu lokinni mun unglingakór kirkjunnar reiða fram grjónagraut í safnaðarheimilinu og er  það hluti af fjáröflun kórsins og þar verður einnig hinn árlegi og glæsilegi kökubasar kórsins.  Þetta verður skemmtileg og innihaldsrík stund fyrir alla fjölskylduna.  Sjáumst í kirkjunni!

Í gærkvöldi, sunnudagskvöldið 20. nóvember, var kirkjukórnum boðið að syngja ásamt kikrjukór Hveragerðis- og Kotstrandarsókna á tónleikum í tilefni af sjötíu ára afmæli þeirra. Kórarnir sungu saman þrjú verk og söng Halla Dröfn Jónsdóttir einsöng í tveimur þeirra.

Meðfylgjandi eru nokkrar myndir frá tónleikunu

Síðastliðinn laugardag, 1. október, tók kirkjukór Selfosskikju á móti 70 manna norskum kór. Norski kórinn er í raun ekki starfandi kór heldur hópur fólks úr nokkrum kórum af vesturströnd Noregs.  Kórarnir héldu sameiginlega tónleika í kirkjunni þar sem þeir sungu bæði saman og sitt í hvoru lagi. Tóleikarnir tókust vel og gaman fyrir kirkjukórinn að taka þátt í verkefni sem þessu.